कोन्तुला की काम्पीमा ?

केशराशी झरना झै
शिर देखि पाउ सर्लक्क
मुस्कान मिठो देख्दा तिम्रो
बेहोश भएँ पर्लक्क
उज्याला तिम्रो मुहार लाग्छ
पुर्णिमाको चन्द्रमा
कहाँ भेट्छौ कान्छी तिमी
कोन्तुला की काम्प्पीमा ?

सुन्तला झै ओठ माझ
दन्तलहर टल्केको
फिनल्याण्डको चिसोमा पनि
जिउमा आगो सल्केको
एकै नजरमा मन बस्यो
चुमौ की तिम्रो निधारमा
कहाँ भेट्छौ कान्छी तिमी
कोन्तुला की काम्पीमा ?

बारुली झै कम्मर तिम्रो
झन्डै झन्डै छिनेको
मेट्रोको भिडमा पनि
एकै नजरमा चिनेको
सिटमा बसे चिसो हुन्छ
आउ बस काखैमा
कहाँ भेट्छौ कान्छी तिमी
कोन्तुला की काम्पीमा ?

आकर्षण किन हुन्छ ?

प्रेम । यो शब्द प्रेमपिण्ड रिलिज भएपछी सुरु भएको होईन । मानव सभ्यता सँगसंगै यसको पनि ईतिहास छ । प्रेमका नाममा कैयौ कथा, कबिता, सिनेमा, कला देखि हत्या र हिंसा समेत भएका छन । धेरैले परिभाषा दिने प्रयास गरेका छन प्रेमको तर सबैलाई चित्त बुझ्दो कुनै पनि छैन । धेरै फिल्ममा जोड्दार डाइलग मारिन्छ ' प्रेममा धनी गरीब, जात भात केही हुन्न ।' भनेर । खैर प्रेममा जातभात, धनी गरीब,र उमेरको महत्व हुन्न भने पनि प्रेमको पुर्व अवस्था अथवा आकर्षणको अवधीमा भने यी सबै कुराको निकै महत्व हुन्छ । बयस्क अवस्थामा महिला र पुरुष एक अर्कातिर आकर्षित हुनु स्वाभाबिक र प्राक्रितिक हो । किन हुन्छ त आकर्षण ?

मानव सभ्यताको सुरुवात ढुङे युगदेखि प्रारम्भ भएको भनेर थुप्रै लेखहरुमा पढ्न सकिन्छ । ढुङ्गे युगमा मानिस जनावरको शिकार गरेर आफ्नो जिबिकोपार्जन गर्दथे । समान बातावरण र अवस्थामा पनि पुरुषहरु महिला भन्दा बलियो, अग्लो, बढी कपाल उम्रने र यौन सम्बन्धको निमित्त चाँडो तयार हुनुमा उनीहरुमा अवस्थित बिभिन्न हर्मोनले ठुलो भूमिका खेलेको हुन्छ । यसलाई प्रकृति प्रदत्त क्षमता भन्न सकिन्छ त्यस्तै महिलाहरुमा हुने प्रजनन क्षमताले आजसम्म संसार चलिरहेको छ । संसारको निमित्त महिलाको प्रजनन क्षमता बरदान भएपनि महिला कै नीम्ति भने अहिले सम्म पनि कमजोरीको कारण बनेको छ । महिलाले सन्तान जन्माउनको निमित्त आफु निस्क्रिय बनेर बस्नुपर्ने हुन्छ । यो अवधी नौ महिनाको हुन्छ भने बच्चाको स्याहार सुसार नीम्ति अर्को पाँच बर्ष कुर्नुपर्ने हुन्छ । जुन अवस्थामा उनी शिकार गर्न र आफ्नो र बच्चाको नीम्ति आहारा जुटाउन असर्मथ हुन्छिन । त्यसकारण उनले कुनै एक बलशाली पुरुषको सहारा लिनुपर्ने हुन्थ्यो ताकी उसले शिकार गरेर उनको र बच्चाको पालनपोषण गरोस । यही क्रम ढुङ्गे युग भरी चलिरह्यो । तत्कालिन अवस्थामा शारिरिक क्षमता नै जीवनयपनको श्रोत भएको हुँदा त्यसबेला देखि नै महिलाहरु त्यस किसिमको पुरुषप्रति आकर्षित हुन्थे । फलस्वरुप: आधुनिक युगमा आइपुग्दा समेत महिलाहरु अग्लो, बलिष्ठ शरीर, चौडा छाती भएको पुरुष मन पराउछन किन भने उनीहरुको अवचेतन मनमा ढुङ्गे युगदेखीको प्रभाव परेको छ । टेस्टोस्टेरोन हर्मोनको मात्रा पुरुष भन्दा कम भएको कारण महिलाहरु पुरुष जति यौन कृयामा संलग्न हुदैनथे । बर्षमा एक पटक मात्र सन्तान जनाउन सक्ने क्षमताको कारण एक भन्दा बढी पुरुषसँग यौन सम्बन्ध राख्नुको आवश्यक्ता पनि परेन ।

पुरुष पनि महिलाबाट सन्तान जन्माउने अपेक्षा राखेर सम्बन्ध बनाउथ्यो । सन्तान जन्माउनैका निमित्त उसले महिलाको छनोट गरेको हुन्थ्यो । जति जनासँग यौन सम्बन्ध राख्यो उतिनै सन्तान जन्मिने भएकोले एक भन्दा बढी सँग यौन सम्बन्ध राख्नु पुरुषको नीम्ति स्वाभाबिक हुनपुग्यो । पुरुषको रोजाइ आधुनिक युगमा समेत सन्तान जन्माउनको निमित्त उपयुक्त शरीर भएकी महिला पर्छ । एक अध्ययन अनुसार, कम्मर-नितम्बको अनुपात ०.६७ देखि ०.८ सम्म भएको महिलालाई सबै भन्दा बढी पुरुषले मन पराएको पाइयो । सो अनुपातको शरीर हुने महिला बच्चा जन्माउनको निमित्त अती उपयुक्त हुन्छिन । आधुनिक युगमा समेत पुरुष, महिलाको शरीरमा बढी ध्यान दिने गर्छ ।

मानव सभ्यताको सुरुवात देखि नै महिला पुरुषको बलिष्ठता तिर आकर्षित हुन्थिन भने पुरुष महिलाको प्रजनन क्षमता तिर । यी दुबै आकर्षण सन्तान जन्माउनको निमित्त हो । तर आजको आधुनिक युगमा महिला र पुरुष एक अर्काप्रती आकर्षित गराउने तत्व परिवर्तन भएको देखिन्छ तर आधारभुत कुरा भने समान नै छन् । आजको युगमा महिला सलमान खानको जस्तो सुगठित शरीर, समाजमा राम्रो स्ट्याटस भएको, शिक्षित, र धनी पुरुष तिर आकर्षित हुन्छिन । पुरुषमा उल्लेखित सबै गुणहरु उनको र सन्तानको नीम्ति 'क्षमता र सम्भावना' हुन । आफ्नो र आफ्नो सन्तानको सुखको नीम्ति उनको रोजाइमा परिवर्तन भएको हो । आजको युगमा जङलमा बँदेल मात्र मार्ने सक्ने पुरुषले उनको सन्तान हुर्काउन नसक्ने भएकोले समय सापेक्ष चाहनामा परिवर्तन आएको हो । त्यस्तै पुरुष पनि महिलाको शरीरप्रती नै आकर्षित हुन्छन । यसको बुझाईमा आफ्नो जिउलाई कर्भी बनाउने, थ्रेडिङ, मेक अप, इत्यादीमा महिलाहरु ध्यान दिन्छन । समयको माग अनुसार सुन्दरतामा परिवर्तन आएको कारण पुरुषको सोचाइमा पनि परिवर्तन आएको हो । तर पुरुषको आधारभुत चहाना भने सन्तान
उत्पादन गर्न सक्ने महिला नै पर्छ । सो कुरा माथि उल्लिखित अध्ययनले देखाउछ ।

समलिङी बाहेक, महिलाको सुन्दरतामा पुरुष मात्र होईन महिला पनि आकर्षित हुन्छन् । ८-१२ हप्ता र ६-८ महिनाको उमेर समुहका बच्चाहरुलाई सुन्दर युवतीको फोटो देखाउदा धेरै बेर हेरेको पाइयो भने नराम्रो अनुहारको फोटोमा हेरिएन । त्यस्तै सुन्दर अनुहार र शरीर बनाएको खेलौनामा सोही उमेर समुहका बच्चाहरु धेरै बेर खेलिएको पाइयो । यसबाट के प्रमाणित हुन्छ भने महिलाको सुन्दरतामा बयस्क पुरुष- महिला मात्र होईन बच्चाहरु समेत आकर्षित हुन्छन् ।

महिला र पुरुषले एक अर्कालाई लगाउने आरोपहरु यी हुन :
"सबै केटाहरु एकै हुन, खाली केटीको जिउसँग खेल्न खोज्छन ।"
"पैसा भए केटीहरुलाई केही चाहिदैन, त्यति कै आइपुग्छन ।"

यी दुबै आरोप सहि पनि हुन र गलत पनि । 'आकर्षण 'को अवस्थामा पुरुष महिलाको शरीरसँग आकर्षित हुन्छ भने महिला पुरुषको क्षमतासँग । संसारमा कमै त्यस्ता पुरुष होलान् जसले धनी तर साँढेको जत्रो जिउ भएको केटी तिर आकर्षित होस । त्यस्ता युवती बिरलै होलान जसले आफ्नो कुम सम्म आइपुग्ने, सुकेनास र सडकमा बस्ने पुरुषलाई मन पराउन । पुरुष र महिलाको अवचेतन मनमा अवस्थित चाहना र समय सापेक्ष माग अनुसार एक अर्कातिर आकर्षित हुन्छन् । यस हिसाबमा माथिका आरोप हरु सहि हुन तर ती आरोपको लागु जीवनभर एकनास रुपमा लाग्दैनन । जस्तै कुनै पुरुषले आफ्नी श्रीमती र सन्तानको भबिष्य दाउमा राखेर यौन सम्बन्ध बनाउन खोज्दैन । पुरुषलाई आकर्षित गराउन जेसिका अल्बा अथवा बिपासा बसु जस्तो शरीर भए पुग्छ तर जीवन बिताउने सवालमा पुरुष सेक्सी देखिने महिलातिर नभै घर चलाउने क्षमता भएको महिलातिर आकर्षित हुन्छ । सरल रुपमा घरजम गर्न सुन्दर देखिने, सरल स्वभाव र हसिली युवती पुरुषको रोजाइ हुन्छ ।

भलै महिलाहरु बलिष्ठ शरीर, चौडा छाती, अग्लो, धनी र शिक्षित पुरुषतिर आकर्षित हुन्छन तर त्यस्ता पुरुषतिर प्रेम सम्बन्ध भने राखिहाल्दैनन । प्रेम सम्बन्ध बनाउनको निमित्त महिलाको चाहना जटिल हुनेगर्छ । महिलाले प्रेमीको रुपमा रोज्न उसमा उल्लेखित गुणका अलावा -
प्रेम (महिलाको भाषामा गिफ्ट किनिदिने, हालखबर सोध्ने, हेरचाह गर्ने, सुरक्षा दिने)
बिस्वासिलो (अन्त आँखा नडुलाउने)
दयालु (उसको क्षमता माथि महिलाको पहुँच हुने)
संकल्प (पुरुषको तर्फबाट आफ्नो ‘क्षमता’ महिलालाई प्रदान गर्ने ग्यारेन्टी )
शिक्षित र चेतनशिल ( पुरुष ‘क्षमता’को समय सापेक्ष माग)
उपरोक्त गुण सम्पन्न पुरुषलाई एउटी महिलाले आफ्नो रोजाइमा राखेकी हुन्छिन ।

तसर्थ, ढुङ्गे युग देखि पुरुष र महिला एक अर्कातिर आकर्षित हुनुमा कारण फरक भए पनि उद्देश्य भने सन्तान उत्पादन, पालन र पोषण नै हो । उनीहरुको अवचेतन मनमा लुप्त चाहना र समय सापेक्ष मागको जटिलताको कारण एक अर्कालाई बुझ्न कठिन हुन्छ ।

यो लेख Allan & Barbara Pease द्वारा लिखित Why men want sex and women need love पुस्तकमा आधारित हो ।
फोटो : www.toonpool.com